ORDENSREGLEMENT FOR ELEVAR
VED FYLKESKOMMUNALE VIDAREGÅANDE SKOLAR
I MØRE OG ROMSDAL

Forskrift fastsett med heimel i opplæringslova (Oppl) av 17.07.98 nr 61, §§ 2-9 og 3-7.

DEL A

FORMÅL

§ 1 Alle elevar har rett til eit godt fysisk og psykososialt miljø, som er rusfritt, og fritt for mobbing, vald og anna krenkande åtferd. Formålet med reglementet er å skape godt samarbeid, god trivsel, respekt og medansvar. Reglementet skal fremme god orden og gode arbeidsvanar og slik legge til rette for god læring.
Reglementet forpliktar heile skolesamfunnet.
Reglementet skal omfatte:
· Elevane sine rettar og plikter
· Orden og åtferd
· Tiltak overfor elevar som bryt reglement, og framgangsmåten ved handsaming av slike saker

VIRKEOMRÅDE

§ 2 Reglementet gjeld for alle elevar ved skolen under opplæring og, så langt anna ikkje er bestemt, også for vaksenopplæringa sine elevar, lærlingskoleelevar, hospitantar og andre når opplæringa går føre i skolen sin regi.
Reglementet gjeld også ved opplæringsformer og aktivitetar som gis under skolens ansvar og regi utanfor skolen sitt område, så langt dette ikkje er i strid med lokalgitte påbod eller forbod, eller ved ekskursjonar.
Reglementet er retningsgivande for vurdering av orden og åtferd.

RETTAR

§ 3 Elevane har rett til vidaregåande opplæring jfr. opplæringslova med forskrifter, fylkeskommunale vedtak og gjeldande læreplanar.

§ 4 Eleven har rett til ei opplæring som er tilpassa føresetnader, evner og behov. Eleven har derfor rett til og skal delta i:
· Planlegging av opplæringa
o utforming av periodeplanar
o tolking og analyse av læreplanmål
o utforming av læringsmål
o val og utforming av kriteri for vurdering
o val av lærestoff i forhold til læreplanane, m.a. rett til sjølv å velje læreverk
o val av arbeids- og vurderingsformer
· Gjennomføring av opplæringa

· Vurdering av opplæringa
o sluttresultatet av arbeidet i forhold til læringsmål.
o prosessen som førte fram til resultatet.
Desse momenta kan vere individuelle for den enkelte eleven, felles for ei mindre gruppe eller for større grupper.
Skolen er ansvarleg for å gi elevane dei nødvendige føresetnadene for å kunne delta aktivt i dette arbeidet.

§ 5 Elevane har rett til å få tilbakemelding, oppfølging og rettleiing i forhold til dei måla den enkelte arbeider etter.

§ 6 Det skal gjennomførast førebudde elevsamtalar minst ein gang kvar termin mellom elev og kontaktlærar eller annan lærar.

§ 7 Ved faglege, personlege eller sosiale vanskar som har innverknad på opplæringa, har elevane rett til rådgiving, oppfølging og hjelp til å finne seg til rette, m.a. tilgang til sosial- og spesialpedagogisk teneste.

§ 8 Elevane har rett til rådgiving om utdanning og yrkesval.

§ 9 Skolen skal ha eit system som sikrar at det blir vurdert i kva grad organiseringa, tilrettelegginga og gjennomføringa av opplæringa er med på å nå dei måla som er fastsett for eleven eller gruppa.
Grunnlaget for vurderinga er læreplanverket sin generelle del og fagspesifikke delar som heile skolesamfunnet er forplikta overfor.
Eleven har rett til og skal delta i denne vurderinga.

§ 10 Elevane har rett til og bør ta opp med skolen (faglærar, kontaktlærar, rådgivar, skoleleiinga, evt. gjennom elevtillitsvalte) forhold som ikkje fungerer tilfredsstillande.

§ 11 Elevane har rett og plikt til å danne elevråd og å vere representert i skoleutval, skolemiljøutval og arbeidsmiljøutval.
Elevrådsrepresentantar har rett til regelmessige møte med skoleleiinga.

PLIKTER

§ 12 Elevane har plikt til å rette seg etter lover, reglement og instruks som gjeld.

§ 13 Elevane pliktar å delta aktivt i opplæringa i den forma ho blir avtalt.

§ 14 Eleven skal snarast muleg ta kontakt med faglærar dersom han/ho ikkje kan følgje opp arbeid til avtalt tid.

§ 15 Elevane skal følgje verne- og tryggleiksreglar og bruke slikt arbeidsty og verneutstyr som blir kravd i læreplan eller som er påbode av arbeidstilsynet, departementet eller skolen.

§ 16 Elevane skal halde seg med nødvendig lærestoff, materiell og utstyr til eige bruk som skolen ikkje held. Pålagt materiell og utstyr eller betaling for dette må ikkje vere i strid med forskrift eller vedtak frå departementet eller fylkeskommunen.

§ 17 Skolen sin eigedom og skolen sitt utstyr skal brukast med omtanke. Hærverk og skade kan føre til erstatningsansvar, jf. skadeserstatningslova.

§ 18 Elevar som gjennom arbeid, oppdrag eller verv i samband med vidaregåande opplæring blir kjend med spesielle opplysningar, har teieplikt etter forvaltningslova sine reglar § 13 - 13 f. Teieplikta gjeld også etter at eleven har avslutta vidaregåande opplæring.

DEL B

SÆRSKILDE REGLAR FOR DEN EINSKILDE SKOLEN

ARBEIDS- OG LÆRINGSMILJØ

§19 Det skal leggjast vekt på å skape eit godt arbeids- og læringsmiljø prega av engasjement, aktiv deltaking og gode samarbeidsformer mellom alle i skolen. Det er viktig å vise respekt og medansvar og unngå eller hindre åtferd som har negativ innverknad på miljøet.

§20 Alle må opptre omsynsfullt, realt, høfleg og med respekt overfor andre.

§21 Alle må vise respekt for opplæringa og bidra til å halde arbeidsro i timane.

§22 Alle skal møte presis, førebudd og med nødvendig utstyr/læremiddel/bøker til timar og avtalar.

§23 Alle skal bidra til å halde det reint og ryddig over heile skolen, både ute og inne, og fara fint åt med skolebygningane og skolen sitt utstyr og materiell.

Mat kan, om ikkje anna er avtalt med lærar, berre nytast i klasserom i matfriminutt og ved heildagsprøvar/eksamen. Elevane har høve til å ha drikkevatn tilgjengeleg i timane. Må elevar nyte anna drikke, må dette avtalast med faglærar og skje på ein måte som ikkje forstyrrar undervisninga. I friminutta unntatt matfri skal elevane forlate undervisningsromma, og dørene skal låsast. For spesialrom gjeld eigne reglar.

I kantina pliktar alle å rydde av borda etter seg og plassere koppar og bestikk på tilviste plassar. Avfall skal kastast i avfallskorgene. Elevane pliktar til kvar tid å rette seg etter dei pålegga kantinedrivaren set for bruken av kantina.

I klassar der ordenselev blir oppnemnd etter tur, må han/ho syte for å halde orden i arbeidsrommet og elles utføre dei ordenspliktene som gjeld til kvar tid. Elles har kvar elev plikt til å rydde etter seg på klasserom, lesesal og elles på skoleområdet.

Elevar som nyttar Surnadal Idrettshall må rette seg etter dei reglane som til kvar tid gjeld for bruken av hallen.

Elevane må gi beskjed til skolen kvar dei bur og melde frå om dei flyttar/skiftar hybel.

§24 Det påligg alle å unngå uønskt og/eller ulovleg framferd som t.d. hærverk, vald, mobbing, rasistiske utsegner og handlingar, seksuell trakassering, sjikane pga. religion eller livssyn, etc. Alle bør te seg på ein slik måte at det ikkje oppstår mistanke om slik åtferd. Kjeftbruk/bannskap, slåssing/knuffing og forstyrring av andre sin aktivitet er å vise mangel på respekt og omsyn.

§25 Elevar som ønskjer å bruke skolen sine oppslagstavler, må få oppslaga godkjent og påført skolens stempel. Det er ikkje høve til å henge opp meldingar, plakatar og liknande andre stader enn på oppslagstavlene utan etter avtale med rektor/inspektør.

Elevane kan bruke oppslagstavlene i klasserom etter avtale med kontaktlærar.

§26 Internett/data skal brukast berre i opplæringssamanheng, som avtalt med lærar innanfor reglar for nettvett og norsk lov. Skolen kan utarbeide eigne, meir detaljerte reglar for nett-/databruk; desse utgjer da ein del av skolereglementet.

Brot på reglane kan medføre at ein for ein periode ikkje får tilgang til skolens datautstyr/-nett og at ein for ein periode blir underlagt resrtriksjonar når det gjeld bruk av PC på skolen. I tillegg gjeld det som står under §34 om tiltak ved reglementsbrott.

§27 Mobiltelefonar skal, når ikkje anna er avtalt, vere avslått/slått på stille og oppbevarast ute av syne i opplæringssituasjon/undervisningsrom. Anna elektronisk kommunikasjonsutstyr som f. eks. mp3-spelar, skal dersom det ikkje er avtalt med faglærar, ikkje nyttast. Ved prøvar kan mobiltelefon/elektronisk kommunikasjonsutstyr krevjast innlevert på førehand.

Bruk og/eller oppbevaring i strid med reglane vil kunne føre til beslaglegging for resten av timen/dagen, og ved gjentatte tilfelle til at eleven ikkje får ha med mobiltelefon/anna elektronisk kommunikasjons- utstyr på skolen. I tillegg gjeld det som står under §34 om tiltak ved reglementsbrott.

§28 Motorkjøretøy og syklar skal parkerast på tilviste plassar. I skoletida er bruk av motorkjøretøy på skoleplassen og mellom dei ulike skolebygga forbode, unnateke nødvendig transport. Gjentekne eller alvorlege brott på denne paragrafen kan medføre at ein elev blir nekta å bruke motorkjøretøy på skolens område for kortare eller lengre tid. Farleg og uvettig bruk av motorkjøretøy vil bli meldt til politiet.

§29 Det er ikkje lov å røyke, snuse eller bruke andre tobakksprodukt i skolens bygg og uteområde, og i lokale som skolen leiger. Surnadal kommune har vedtatt at heile skoleområdet på Øye skal vere røykfritt, og §29 gjeld dermed heile dette området.

Ved brott på reglane kan snus/sigarettar/tobakk bli beslaglagt og eleven kan nektast å ha snus/sigarettar/tobakk med på skolen. I tillegg gjeld det som står under §34 om tiltak ved reglementsbrott. Elevar som bruker tobakk skal ha tilbod om avvenningskurs.

§30 Bruk eller oppbevaring av rusmiddel er forbode på skolen sitt område. Det er også forbode å vere påverka av rusmiddel på skoleområdet eller ved aktivitetar i skolens regi utanfor skoleområdet. Rusmiddel vil bli beslaglagt, og ulovlege rusmiddel vil bli levert til politiet.

§31 Bruk og/eller oppbevaring av våpen og farlege gjenstandar (gjenstandar som kan brukast til å gjere skade på andre, dersom det ikkje framstår som truleg at gjenstanden skal brukast til andre formål) er forbode. Slike gjenstandar vil bli beslaglagt. Ulovlege gjenstandar vil bli overlevert politiet, og politianmelding vil bli vurdert.

§32 Fråvær

Aktiv deltaking er nødvendig for god læring. Elevane er av den grunn forplikta til å møte presis til opplæringa med mindre det ligg føre avtale med rektor, kontaktlærar eller faglærar om ei anna arbeidsform, eller at sjukdom eller annan tvingande grunn (lovleg fråvær) gjer at dei ikkje kan møte. I kroppsøving og beslekta fag skal ein møte til time og vere til stades sjølv om ein ikkje (fullt ut) kan delta pga helsemessige eller andre årsaker.

Faglærar kan gi enkeltelevar fri inntil ein time, kontaktlærar kan gi enkeltelevar fri inntil ein dag. Elev som ønskjer fri meir enn ein dag, må levere skriftleg søknad til rektor/assisterande rektor seinast 3 dagar på førehand. Berre rektor/ assisterande rektor kan permittere klassar eller grupper.

Forseintkomming til timar og timefråvær vil bli registrert. Gjentekne brot på reglane om presist oppmøte kan få konsekvensar for karakter i orden/åtferd.

Alle elevar skal føre fråværet i ei særskild fråværsbok/meldingsbok. Denne boka skal alltid vere med på skolen. Alt fråvær skal førast der, og boka skal leggast fram for

kontaktlærar før planlagt fråvær og så snart som muleg etter anna fråvær. Både eleven og kontaktlærar signerer fråværsmeldinga.

Elevane skal føre forseintkommingar i fråværsboka. Dersom ein elev meiner å ha gyldig grunn til å møte for seint, skal han/ho straks legge fram skriftleg melding for faglærar, som rapporterer til kontaktlærar.

Alt fråvær for elevar skal førast på vitnemål og kompetansebevis. Fråvær skal førast i

dagar og enkelttimar. Rektor kan bestemme om fråvær for den som ikkje er elev i alle fag skal førast i dagar og timar eller berre i timar.

Årsaka til fråvær kan krevjast ført på dokumentasjonen. Eleven har sjølv ansvaret for å

dokumentere årsaka til fråværet. Organisert eller sjølvstendig studiearbeid, mellom anna skoleadministrative gjeremål etter avtale med faglærar eller rektor, skal ikkje reknast som fråvær.

Rektor kan gi elevar fri frå opplæringa i opptil 14 skoledagar i eit skoleår utan at desse

dagane skal førast som fråvær på dokumentasjonen. Det gjeld til dømes fråvær i samband med arbeid som tillitsvald, politisk arbeid, hjelpearbeid, lovpålagde oppmøte og fråvær av helse- og velferdsgrunnar. Normalt skal elevar søkje om slik fri frå opplæringa på førehand. Elevar som er medlemmer av andre trussamfunn enn Den norske kyrkja, har innanfor totalramma på 14 skoledagar rett til inntil to dagar fri ved religiøse høgtider. Når elevar får løyve til å ta fri, bør skolen leggje til rette for at dei kan gjere ein innsats for å kompensere for det.

Om ein elev på grunn av sjukdom eller annan tvingande grunn må forlate undervisninga i løpet av skoledagen, skal eleven alltid klarere dette med kontaktlærar/faglærer og melde frå til administrasjonen/ekspedisjonen. Eleven fyller ut og leverer skjema før han/ho forlet skolen. Skjema kan ein få på skolens ekspedisjonskontor.

Dersom fråværet varer meir enn tre dagar i samanheng, skal skolen ha melding seinast den 4. fråværsdagen. Melding pr telefon/sms er tilstrekkeleg.

Høgt fråvær, same kva grunnen er, kan føre til at grunnlaget for å gi termin- eller standpunktkarakter manglar. Dersom det er fare for at ein elev ikkje får termin- eller standpunktkarakter, skal eleven og føresette varslast skriftleg.

Skolen skal hjelpe elevar som får mykje fråvær på grunn av langvarig/kronisk sjukdom eller omsorgsansvar etter avtale med eleven for å unngå tap av opplæring og vurderingsgrunnlag (ekstra opplæring, ekstra prøver, sjølvstendig studiearbeid).

Eleven på si side pliktar ved fråvær å halde seg orientert om dei faglege aktivitetane i klassen/gruppa, herunder kva for lekser/oppgåver som blir pålagt elevane.

Ein viser og til eige prøvereglement.

Ulovleg fråvær kan føre til nedsett karakter i orden/åtferd.

§33 Fusk eller forsøk på fusk

Bruk av ulovelege hjelpemiddel og kommunikasjon med andre i ein prøvesituasjon blir rekna som fusk. Det same gjeld kopiering/avskrift av andre sitt arbeid som blir levert som eige produkt ved innleveringar eller prøvar.

Dersom ein elev blir teken i fusk eller forsøk på fusk ved eksamen (regulert ved forskrift til opplæringslova § 4-25) eller prøver, skal forholdet meldast til rektor.

Normalt blir karakteren på den prøva eller arbeidet det gjeld, annullert og karakter i orden/åtferd vurdert sett ned.

Skolen har eige prøvereglement som ein del av skolereglementet.

§34 Konsekvensar for elevar som bryt reglane: Brott på reglane vil resultere i reaksjonar mot eleven i form av sanksjonar og/eller nedsett karakter i orden/åtferd. Sanksjonar vil vere:

• munnleg/skriftleg åtvaring frå lærar/tilsett
• munnleg/skriftleg åtvaring frå rektor
• skriftlege avtalar
• kontakt med heimen og involvering frå føresette
• vere på skolen før og etter skoletid i samband med samtalar med lærar/rektor og/eller utføring av pålagde oppgåver
• nedsett karakter i orden og/eller åtferd eller orden og åtferd
• midlertidig beslag av gjenstandar o.a. som blir brukt i strid med skolereglementet
• beslag av rusmiddel, ulovlege gjenstandar
• pålegg om oppgåver for å rette opp skade som elevar har påført skolen sin eigedom eller eigendelar (rydde boss, vaske golv, fjerne tagging,,)
• erstatningsansvar
• avgrensa tilgang til/utelukking frå spesielle aktivitetar og/eller fasilitetar ved gjentekne eller alvorlege brot på reglar/retningsliner for desse
• mellombels eller permanent bytte av gruppe
• bortvising frå gruppe for resten av timen/arbeidsperioden etter avgjerd av faglærar eller resten av dagen etter avgjerd frå rektor
• bortvisning frå skolen for lengre tid, inntil 5 dagar, enn resten av skoledagen
• bortvisning frå vidaregåande skole for resten av kurset
• tap av rett til vidaregåande opplæring
• melding av straffbare tilhøve
• stort fråvær kan medføre at grunnlaget for å gi vurdering med standpunktkarakter manglar

§35 Saksbehandling

Før refsingstiltak blir sett i verk, skal eleven ha høve til å forklare seg. Tiltaka må stå i rimeleg forhold til regelbrottet, og tiltaka må komme så nær regelbrottet i tid som muleg. Det er berre den eleven eller dei elevane som har gjort seg skuldig i reglementsbrott som kan refsast. Kollektiv avstraffing er ikkje lov. Ein elev kan heller ikkje straffast på ein nedverdigande/krenkande måte.

Ved bortvising for lengre periode enn resten av dagen skal rektor først rådføre seg med eleven sine lærarar. Før ein tek i bruk slik bortvising skal skolen først vurdere alternative tiltak, t.d. hjelpetiltak og/eller individuell kontrakt, og rådgjevar eller sosialpedagogisk personale skal ha uttalt seg.

Refsingstiltak er enkeltvedtak som kan påklagast til fylkeskommunen si klagenemnd. (Fylkesutvalet)

§36 Det skal leggjast vekt på å skape gode samarbeidsformer mellom skole og heim, og foreldre/føresette. For elevar under 18 år skal det arrangerast foreldremøte minst ein gong kvart skoleår.

§37 For spesielle forhold som ikkje fullt ut vert dekt av reglementet eller felles reglar gitt av departementet eller fylkeskommunen, kan skolen utarbeide eigne reglar, t.d.:

- ordningar og bruk av kantina

- bruk av bibliotek/lesesal

- bruk av spesialrom (t.d. laboratorium, auditorium)

- bruk av utstyr

- bruk av verkstad, kjøkken o.s.b.

- bruk av datarom og internett

- reglar ved ekskursjonar

- reglar om parkering

- reglar for elevskap

- reglar for skoleavis/russeavis

- reglar for elevråd

- reglar for prøvar

Utlån av elevskap

Elevane kan få tildelt kvar sitt nummererte skap til oppbevaring av bøker og andre verdisaker. Dei som låner skap, må ha med seg hengelås til skapet, og har sjølv ansvaret for det som er i skapet.

Skapa skal vere opne og tømte når skoleåret er slutt, eller når eleven sluttar på skolen.

Elevane skiftar skap når dei skiftar klasse/gruppe eller årstrinn.

Det skal ikkje skrivast eller limast noko på skapa verken utvendig ellr innvendig.

Biblioteket

Innhald:

-Ein god del skjønnlitteratur,først og fremst nyare norsk, men og omsett og eldre norsk, bl. a. fleire lydbøker. Ein del biografiar. Nokre romanar på engelsk og tysk.

-Ein del bøker om samfunnsfaglege emne; debattbøker o.l. og ein del verk om historie/kulturhistorie/litteraturhistorie m.m.

-Leksikon; norske og engelske, ein del andre oppslagsverk og litt annan faglitteratur.

-Avisklipp, foldarar o.l.

-Videoar.

-Datamaskinar med nettilgang.

Om bruken av biblioteket og den stille lesesalen:

-Klasser/grupper skal ikkje ha tilhald på biblioteket utan tilsyn.

-Bibliotek/lesesal er eit studieområde og skal brukast til studiearbeid. Datamaskinene skal brukast til søk i samband med det. Lesesalen skal normalt brukast til sjølvstendig arbeid og ikkje til gruppearbeid; brukarane skal rydde pultane etter seg.

Mat og drikke skal ikkje nytast i bibliotekområdet/på lesesalen/i auditoriet.

-Samlinga er lagt inn på micromarc; for datasøk - ta kontakt med kontoret. Bøkene er plassert i hyllene etter emne; spør viss du tykkjer det er vanskeleg å finne fram.

-Alle lån (bøker som blir tekne med ut av biblioteket) skal registrerast. Ein må ikkje låne bøker vidare til andre utan å omregistrere lånet. Den eit lån er oppført på, er økonomisk ansvarleg om den lånte artikkelen kjem bort eller blir øydelagt.

-Leksikon og andre oppslagsverk skal ikkje lånast ut, men kan takast med til kopieringsmaskina.

-Bøker som blir tekne ut av hyllene, må setjast tilbake på rett plass. Dersom du er usikker på kvar dei skal stå, så legg dei i ryddige stablar på bord/hylle for bøker som skal setjast på plass. Ikkje sett dei inn på feil plass, da finn vi dei ikkje. Tidsskrift og aviser skal setjast på plass i hyllene etter bruk

-Hugs å levere tilbake lånte bøker.

-Kom gjerne med forslag om innkjøp av bøker og anna, og idear til bruk av biblioteket.

Vernereglar for verkstad

Vernebriller

Kvar elev pliktar å skaffe seg vernebriller. Brillene skal alltid brukast under arbeid med maskinene på verkstaden. Ved elektrisk sveising skal vernebrillene brukast under verneskjermen for å verne augo når ein tek bort skjermen og slår slagg. Skadde briller skal reparerast eller skiftast med ein gong. Ein kan ikkje arbeide vidare før dette er gjort.

Gass-sveising

Pass alltid på å bruke dei spesielle brillene som det er påbod om ved gass-sveising.

Elektrisk sveising

Her får ein ultrafiolette og ultraraude strålar som augo og huda må beskyttast mot. Ein skal ha ansiktsskjerm, vanlege arbeidshanskar og forkle.

Sveisehanskar

Det skal minst vere eit par sveisehanskar på kvar verkstad. Dei skal til vanleg ikkje brukast. Ved brann i ventilane for gass og sveiseutstyr, skal ventilane stengast når ein har teke på sveisehanskane. Dermed kan ein avvrege ein katastrofe. Alle elevane pliktar å orientere seg om kvar hanskane heng til ei kvar tid.

Klede

Påbode antrekk i verkstaden er gjenknappa kjeledress.

Langt hår

Elevar med langt hår skal ha industrihårnett under arbeidedet i verkstaden. Hårnett er påbode for å unngå

arbeidsulykker ved bruk av verkstadmaskiner og open varme.

Hørselvern

Det må nyttast hørselvern ved sliping i smieavdelinga.

Vernsko

Vernesko skal alltid nyttast av alle som arbeider i verkstaden.

Ansvarleg

Faglæraren for kvar klasse er pålagt å sjå til at vernereglane blir haldne til ei kvar tid.

Eleven er sjølv ansvarleg for at han til ei kvar tid følgjer påbudte vernereglar.

Inspeksjon

Med jamne mellomrom inspiserer verneleiaren verkstadane. Elevar som bryt vernereglane skal automatisk ha merknad i klassedagboka.

Instruks naturfag lab.-rom

LÅSING

-Rommet skal alltid vere låst når det ikkje er undervisning. Elevar skal ikkje bruke rommet utan tilsyn.

UTSTYR

-Alt utstyr skal behandlast forsiktig slik at ein unngår øydelegging.

-Utstyr skal reingjerast og setjast på rett plass etter bruk.

TRYGGLEIK

-Alle grupper som skal bruke lab.-rom, skal få ein gjennomgang av tryggingsreglane ved skolestart. Elevar og lærarar har plikt til å følgje reglane.

TRYGGINGSREGLAR

Følg alle instruksjonar, både skriftlege og munnlege.

Bruk vernebriller ved elevforsøk dersom ikkje anna er sagt.

Nyt aldri mat eller drikke på laboratoriet. Ta aldri i stoff med fingrane.

Gjer deg kjent med dei stoffa og det utstyret du brukar, og ta omsyn til faremomenta bruken medfører, før du startar arbeidet.

Gjer deg kjent med bruk og plassering av brannsløkkingsutstyr, augevaskeflaske, nauddusj og førstehjelpsutstyr.

Reglar for datarom

Mat og drikke skal ikkje nytast.

Datautstyret skal berre brukast til faglege aktivitetar.

Ein skal bruke berre sitt eige brukarnamn og passord.

Ein er sjølv ansvarleg for å halde eigen brukarkonto hemmeleg.

Berre programvare som allereie er installert, skal brukast.

Det er forbode å endre programvare og programoppsett på Pcane.

Brukarane kan bli gjort økonomisk ansvarlege for utstyr dei øydelegg.

Det er forbode å bruke maskinene på ein måte som er krenkande for andre.

Dersom det er kø, er max. tidsbruk pr brukar 45 minutt.

Brukarane pliktar å føre loggbok dersom systemansvarleg legg opp til det.

Reglement og rettleiing for prøvar

1. Under prøven skal det vere stilt i klasserommet.

2. Elevane må ikkje ha noka form for kommunikasjon seg imellom. Elevar som ønskjer opplysningar, treng noko eller ønskjer å forlate rommet for kortare tid, må vende seg til den som har tilsyn med klassen.

3. Elevane er sjølve ansvarlege for at dei har med tillatne hjelpemiddel. Hjelpemiddel skal ikkje lånast frå andre elevar under prøven. Ev. lån av tillatne hjelpemiddel skal skje før prøven tek til. Sekker, vesker, mobiltelefonar m.m. skal setjast på tilvist plass i klasserommet. Mobiltelefonar og anna elektronisk kommunikasjonsutstyr som mp3-spelar og liknande, skal vere avslått og skal heller ikkje brukast i pausar/ved "lufting".

4. Elevar som på grunn av sjukdom ikkje kan møte til ein prøve, må straks melde frå til skolen. Kjøretimar blir ikkje godkjent som fråværsgrunn ved heildagsprøvar og prøvar som er varsla i god tid. Ny prøve kan bli gjeven til elevar som ikkje møter på ein prøve. Den nye prøven kan bli gjeven utan varsel og ny førebuingstid.

5. Dersom ein elev blir teken i fusk eller forsøk på fusk i samband med prøven, skal eleven få melding om at han blir rapportert, og at det er fare for annulering av prøven samt nedsett karakter i orden/åtferd.

Fusk og forsøk på fusk kan vere:

- prate med medelevar under prøve

- gi eller prøve å gi eller formidle hjelp som ikkje er tillaten, til andre, eller

- motta slik hjelp

- å ha eller bruke hjelpemiddel som ikkje er tillatne etter at oppgåvene er delt ut.

6. Ved "lufting" av elevar på prøvar skal det vere maks. 6 elevar i kvar gruppe; ein og ein elev får gå på toalettet.

7. Heildagsprøvar er laga slik at elevane skal kunne arbeide med faglege oppgåver det meste av dagen (kl 09-14). Dersom ein elev skal få levere før kl 12, må det vere etter samråd med faglærar. Eleven må likevel bruke resten av skoledagen på skolen til fagleg arbeid etter avtale med faglærar/kontaktlærar. Dersom ein elev leverer og går frå skolen før kl 12 på ein heildagsprøve, blir fråværet resten av dagen vurdert som ulovleg fråvær.

8. Ved korte prøvar (1-3 timar) skal elevane sitte tida ut viss ikkje anna er avtalt med faglærar.

9. Kontaktlærar er ansvarleg for å gjere dette kjent for sin klasse.